De OIDE OACH hod wieda auf – da ADE is wieda do

Bierwirtschaft „Alte Eiche“ wieder eröffnet, der Ade ist wieder da. Zum Tag des Dialektes heute in der Sprache des Wirtes. Da Ade, da Wirt vom legendären Sigl, hod wieda a Hoamat, und des in Pfaffahofa, glei neban Landrad und da Bolizei in da Inglstädter Strass 36. Lang hods dauert, für a bor Stammgast vom Sigl fast zu lang, aba am Donnersdog um fünfe am Namidog is wor worn.

De guade oide OACH hod ihrn Nama wieda und an Wirt, der nei passt, a. Frühra war do amoi as Gfängnis gegnüba, und a jeda mid am frischn Entlassbladl hod a kostenlose Brotzeit und a Hoibe oda zwao umasonst griagt. Da Bam vor da Wirtschaft is zwar immer no a Kastanie, aber de basst eh besser zum Biergartn, der wo im Summer aufmacha soi. Ab 1862 war in dem Haus a Rosogliobrennerei, des war a Früchtlikör nach italienischn Rezept, ma kannt sogn, de Pfaffahofana warn immer scho des mediterane Volk schlechthin, weil ab 1873 hods dann an gleicher Stell de erste Bierwirtschaft gem. Der Nama „Deutsche Eiche“ kummt aus derer Zeit, ghoasn hod mas aba immer scho „DE OIDE OACH“, wo samma denn.

Da Ade selba is da Wirt vom „OIDN SIGL“, da wo jetzt da Bürgamoasta haust. Ihr wird’s´n eh olle kenna, da Blues selba, mit vui Gfui und da beste Freind vo seine Gäst. Vui Stammgast san do gwen und ham eahm allerleih edles und ausgfoins Zeig für sei neis Refugium midbrocht. Da Ade hods gnomma, se gfreid wia a neuchs Fünfarl und glei a Hoibe Freibier ausgem. Mir hods, zweggs meina, a Haferl Kaffee aus´n oidn Sigl Automat glien, bei dem ma ned Herzkrank sei derf. A Brotzeit gibts a, hod guad ausgschaugt, hob i aba nach dem Kaffee nimma braucht.

Vo Diensdog bis Samsdog ab Fünfe Namiddog hoda auf da Ade, und greifd se auf, seine oidn und a neicha Gäst. Pfaffahofa hod endlich wieda a echte, saubare Boazn mit fesche Weibaleid ois Bedienung und a Ansprach bei an Original Wirt, Zeit is worn.